Banner
Nav Menu
Sidebar

Author: Ron Graham

bislama

Tenkomanmen i Stap long Oltestamen Nomo
—i No Blong Niutestamen

Hemia wan lessen blong Baebol longsaed blong Tenkomanmen. Nao tenkomanmen ya, i stap long oltestamen nomo, we i bin kamtru long Moses. Tenkomanmen ya, i no stap long niutestamen we i kamtru long Jisas Kraes.

Tenkomanmen we Hae God i givim

(Dutronome 5.1-21)

Nao Hae God i tok, i talem se, “Mi mi Hae God, mi God blong yufala. Fastaem yufala i slef nomo blong ol man Ijip, be mi mi tekemaot yufala finis, mi sevem yufala.

1— Bambae yufala i no mas mekem wosip long ol narafala god, yufala i mas mekem wosip long mi nomo.

2— Bambae yufala i no mas mekem pija blong ol samting long heven, no long wol, no long solwota we wol ya i stanap long hem, blong yufala i mekem wosip long hem. Bambae yufala i no mas bodaon long aedol olsem blong mekem wosip long hem, from we mi mi Hae God, mi God blong yufala, mo yufala i man blong mi, nao mi mi no save letem yufala i mekem wosip long narafala god bakegen...

3— Bambae yufala i no mas yusum nem blong mi long fasin we yufala i no ona long mi, from we mi mi Hae God, mi God blong yufala, mo bambae mi givim panis long man we i yusum nem blong mi long fasin olsem.

4— Oltaem bambae yufala i mas tinghevi long Sabat dei, blong holem i tabu. Evri wik, yufala i gat sikis dei blong mekem ol wok blong yufala, be namba seven dei i Sabat dei, i tabu, i blong mi, mo yufala i mas spel long hem. Long dei ya, bambae yufala i no mas wok. Yufala, wetem ol pikinini blong yufala, mo ol slef blong yufala, mo ol anamol blong yufala, mo ol strenja we oli stap long ples blong yufala, bambae yufala evriwan i mas spel long dei ya...

5— Oltaem bambae yufala i mas ona long papa mo mama blong yufala. Sapos yufala i folem fasin ya, bambae yufala i save stap longtaem long kantri ya we mi bambae mi givim long yufala.

6— Bambae yufala i no mas kilim man i ded.

7— Yufala man we i mared, bambae yufala i no mas go slip wetem narafala woman, mo yufala woman we i mared, bambae yufala i no mas go slip wetem narafala man.

8— Bambae yufala i no mas stil.

9— Bambae yufala i no mas giaman blong mekem poen agens long narafala man.

10— Bambae yufala i no mas letem tingting blong yufala i stap long ol samting blong narafala man blong tekem i blong yufala. Bambae yufala i no mas letem we woman blong hem, no slef blong hem, no buluk blong hem, no dongki blong hem, no ol narafala samting we hem i gat i pulum tingting blong yufala olsem.

1 Hemia Wan Loa blong Isrel Nomo

God i bin givim tenkomanmen long ol man long laen blong Isrel, we oli bin slef blong ol man Ijip. God i tekemaot olgeta finis, nao oli fri. God i sevem olgeta finis. God i bin givim tenkomanmen long olgeta (Dutronome 5.1).

Nao yu luk. God i no talem se tenkomanmen ya i loa blong yumi. Yumi no mas stilim loa blong Isrel. Jisas i givim yumi wan narafala gudgudfala loa blong niufala promes (covenant) (Hibrus 8:6).

"Be naoia yumi luk we wok blong pris we Jisas i stap mekem, hem i moa gud, i winim ol wok ya we ol pris ya bifo oli stap mekem. Mo long sem fasin, promes we God i wantem mekem wetem yumi, we Jisas i tekem i kamtru, hem tu i moa gud, i winim promes ya blong bifo, from we ol tok blong mekem i stanap i moa gud" (Hibrus 8:6).

Nao niutestamen long Baebol, i tijim yumi evri samting longsaed blong loa mo promes (covenant) blong Jisas. Be long niutestamen ya, i no gat wan wod nating long hem we i talem se tenkomanmen blong Moses i stap long loa blong Jisas.

Mo tu, i no gat wan wod nating long niutestamen ya, we i talem se yumi mas tinghevi long Sabat dei, blong holem i tabu. Loa blong Sabat dei i stap long promes we Moses i bin tijim ol man blong Isrel nomo. Nao i no stret sippos yumi putum loa ya longsaed promes blong Jisas long niutestamen.

"Man we i ova long mak blong ol tijing blong Kraes, nao i joenem sam moa tok bakegen we i kamaot long tingting blong hem nomo, God i no stap long laef blong hem. Be man we i stap folemgud ol tijing blong Kraes, Papa blong yumi wetem Pikinini blong hem, tufala i stap long laef blong hem." (2Jon 1:9).

God i no bin givim yumi paoa blong joenem loa blong Sabat wetem tijing blong Kraes.

2 Hemia Wan Loa we i No Save Givim Laef

Tenkomanmen i wan loa we i nogat rod blong tekemaot sin mo givim laef we i no save finis. From wanem yumi mas folemgud loa we i mekem yumi ded?

Tenkomanmen “i Kilim Man i Ded”

(2Korin 3:6-9)

“Promes [blong Jisas Kraes] ya i no kamaot long loa we oli raetemdaon, i kamaot long Spirit blong God. Loa [blong Moses] ya i kilim man i ded. Be Spirit blong God i givim laef long man. Loa ya we God i givim long Moses, hem i katem ol tok blong hem long tufala ston...” (2Korin 3:6-7).

“Loa ya i kamtru wetem bigfala laet ya blong God we i saen we i saen, be wok we Loa ya i mekem, i samting blong ded nomo. Mo i klia we bigfala paoa ya blong God i stap saenaot moa long ol wok we Spirit ya i mekem” (2Korin 3:7-8).

“Wok we Loa ya i mekem, we God i stap jajem man se hem i mas panis, bigfala paoa ya blong God i stap saenaot long hem. Be wok we Spirit ya i mekem, we God i stap mekem we man i kam stret man long fes blong hem, bigfala paoa ya blong God i stap saenaot moa long hem” (2Korin 3:9).

Tenkomanmen we i stap bifo long tufala ston, hem i "samting blong ded nomo", mo laet blong hem i gowe finis. Be tijing blong Kraes i gat paoa blong laef blong Tabu Spirit, mo laet blong hem i stap saenaot bigwan.

3 Dividem Toktok blong God long Fasin we i stret gud nomo.

Paul i bin talem Timoti se, "Yu mas traehad long evri rod, blong yu kam prapa man blong wok we God i stap harem gud long yu we long fes blong hem, yu no gat sem long wok blong yu. Yu yu mas kam wan man we yu stap tijim ol man long trutok blong God long fasin we i stret gud" (2Timoti 2:15).

Sapos yumi tijim long Baebol, yumi mas luksave wanem tok i blong Moses, mo wanem tok i blong Jisas Kraes mo ol aposol blong hem. Yumi mas divaedem toktok blong God long wan laen nomo, we i stret gud, i go long medel blong Moses mo Jisas. Long wansaed igat loa blong Moses, long narawan saed i gat trutok blong Jisas (Jon 1:17).

"Loa we God i givim, i kamtru long Moses, be fasin ya we God i stap lavem yumi tumas, mo i stap mekem i gud tumas long yumi, mo fasin ya we God i tru olgeta, Jisas Kraes nomo i soemaot long yumi. I no gat man we i luk God samtaem. Jisas nomo hem i stret pikinini blong God, mo hem i God. Oltaem hem i stap klosap long Papa blong hem, mo hem nomo i soemaot Papa blong hem long yumi" (Jon 1:17-18).

"Bifo, long ol yia we i pas finis, plante taem, God i stap yusum ol profet blong toktok long ol olfala blong yumi long plante naranarafala fasin. Be naoia we i klosap taem we wol ya bambae i finis, hem i yusum Pikinini blong hem blong toktok long yumi. Pikinini ya, hem i stap wok blong God fastaem, taem God i mekem olgeta samting we i stap long wol. Mo God i jusumaot hem finis, blong bambae, taem wol ya i finis, be olgeta samting ya blong wol oli blong hem nomo." (Hibrus 1:1-2).

"Oltaem, God i stap insaed long bigfala laet blong hem, nao Pikinini ya blong hem i olsem laet ya we i saenaot i kam long yumi. Hem i stret pija blong God, we i stap soemaot prapa fasin blong hem. Mo long tok blong hem we i gat paoa, hem i stap holem olgeta samting long wol ya oli stap gud. Taem hem i tekemaot ol sin blong ol man finis, hem i go long heven, i sidaon long raet saed blong God ya we i gat olgeta paoa." (Hibrus 1:3).

Jisas i gat paoa we i bitim Moses, from Jisas hem i stap stret pikinini blong God, be Moses hem i wan profet nomo. Bifo God i usum Moses finis blong toktok long Isrel. Be nao God i usum Pikinini blong hem, Jisas, blong toktok long yumi mo ol man long wol ya.

Sippos yumi stap prijim loa blong Moses blong joenem hem long trutok blong Jisas mo ol aposol blong hem, oraet yumi nomoa stap prijim trutok blong God long fasin we i stret gud.

Nilim long Kros

Long taem we Jisas i mekem sakrifaes blong tekemaot ol sin, naoia hem i mekem wan wok ya we loa blong Moses ya i no save nating blong mekem. So wanem Jisas i bin mekem wetem tok blong Moses?

Pol i talem long ol Kristin man se, "God i fogivim yumi finis from ol sin blong yumi. Hem i ravemaot finis ol tok ya we oli raetem long buk, blong mekem ol kaon blong yumi, wetem ol rul blong Loa ya we oli stap fasem yumi. Hem i tekemaot olgeta samting ya, i olsem we hem i nilim olgeta long kros, wantaem wetem Kraes." (Kolosi 2:14).

Olgeta tok ya we oli raetem long Baebol bifo, oli raetem blong tijim yumi (Rom 15:4). Nao long tok ya yumi haremsave plan blong God. Be loa ya, i no wan sampting nating we yumi mas obei long hem. Tok ya i soemaot Jisas mo kross blong hem. From, yumi mas obey Jisas nomo.


Written in Bislama the national language of Vanuatu. Bislama is one of several creoles spoken in Australia and islands of the Pacific.


DONATE

to simplybible.com
Webservant Ron Graham


Copyright on print
Footer